రోజురోజుకి పెరిగిపోతున్న గ్యాస్…

Friday, November 9th, 2018, 11:00:28 PM IST

మనకి నిత్యావసరమైన వంట గ్యాస్ ధరలు రోజురోజుకూ పెరుగుతూ ఆకాశాన్నంటుతున్నాయి. ఒక్క నవంబర్ నెలలోనే రెండుసార్లు గ్యాస్ ధరలు పెరిగాయి. తాజాగా వంట గ్యాస్‌పై రెండు రూపాయలు పెంచుతూ కేంద్ర ప్రభుత్వం నిర్ణయం తీసుకుంది. ఎల్‌పీజీ డీలర్లకు ఇచ్చే కమీషన్ పెరిగినందున గ్యాస్ ధర పెంచుతున్నట్లు కేంద్రం ప్రకటించింది. పెరిగిన ధ‌ర‌తో న్యూఢిల్లీలో 14.2 కేజీల సిలిండర్ ధర సబ్సిడీతో కలిపి రూ.507.42గా ఉంది. ఇదివరకు 505.34 రూపాయలుగా ఉండేది. నిజానికి సెప్టెంబర్ 2017లో 14.2కేజీల సిలిండర్, 5 కిలోల సిలిండర్‌ను సప్లయి చేసే ఎల్పీజీ డిస్ట్రిబ్యూటర్ల కమిషన్ రూ.48.89, రూ.24.20 గా ఉండేది. అయితే పెరుగుతున్న రవాణా ఖర్చులు, కూలీ లాంటి వాటిని పరిగణనలోకి తీసుకొని ఎల్పీజీ డిస్ట్రిబ్యూటర్ల కమిషన్‌ను పెంచుతున్నట్టు ఆయిల్ మినిస్ట్రీ పేర్కొంది. దీంతో 14.2 కేజీల సిలిండర్‌కు 50.58 రూపాయలు, 5 కిలోల సిలిండర్‌కు రూ.25.29 పెంచుతూ నిర్ణయం తీసుకున్నట్టు ఆ మంత్రిత్వ శాఖ విడుదల చేసిన జీవోలో పేర్కొన్నది.

నవంబర్ ఒకటో తేదీన వంట గ్యాస్ ధరలు రూ.2.94 పెరిగిన సంగతి తెలిసిందే. అప్పుడు ట్యాక్స్, బేస్ ధర పెరగడం వల్ల గ్యాస్ ధర పెరిగిందని మంత్రిత్వ శాఖ పేర్కొంది. ఇప్పుడేమో డిస్ట్రిబ్యూటర్ల కమిషన్ పెరిగిందటూ మరో రెండు రూపాయలను వినియోగదారుల నెత్తి మీద రుద్దుతున్నారు. గత జూన్ నుంచి ప్రతి నెల గ్యాస్ ధరలు పెరుగుతూనే ఉన్నాయి, కానీ తగ్గడం లేదు. ఎక్కువ బేస్ ధర మీద జీఎస్టీని కట్టడం, వెంట వెంటనే బేస్ ధర 16.21 రూపాయలకు పెరగడమే ధరలు పెరగడానికి కారణమట. పెరిగిన ధరల ప్రకారం.. ముంబైలో 14.2 కేజీల సిలిండర్ ధర ప్రస్తుతం రూ. 505.05. కోల్‌కతాలో రూ. 510.70, చెన్నైలో 495.39 రూపాయలుగా ఉంది. స్థానిక పన్నులు, రవాణా ఖర్చుల ప్రకారం గ్యాస్ ధర ప్రతి రాష్ట్రానికి మారుతుందన్న విషయం తెలిసిందే. ఇంకా రానున్న కాలంలో ఇంకెంత పెరుగుతుందో చూడాలి.

  •  
  •  
  •  
  •  

Comments